Saturday, June 02, 2007

الحماية الدولية لحقوق الإنسان والحصبة الألماني . . . و أشياء أخري




أعود إلي طقوسي القديمة في المذاكرة . .غرفتي مرتبة علي غير العادة ، فأنا لا أستطيع المذاكرة وهناك فوضي حولي ، الراديو علي محطة الأغاني الصبح لغاية الساعة 5 وبعدين يقلب علي إذاعة أم كلثوم ،أسمع أغنية الست وبعدين سي عبد الوهاب وبعدين عموكوا الأطرش وبعدين شادية وعبدالحليم ونجاة (الترتيب وفق الظهور) أخلص الكورس دا وأفضل سياحة بقي ف الراديو دا البرنامج العام شوية الشرق الأوسط المهم المذاكرة عندي مرتبطة بالراديو بشكل أساسي ، ولازم بخور ، مسك أو صندل - مسألة راحة نفسية -مج النسكافيه الشديد وأديها بقي مذاكرة للصبح . . المهم يا زملا الدنيا ماشية تمام ، آه بالمناسبة نسيت أقولكوا أنا بامتحن ايه (دبلومة فاشلة كدا ف كلية سياسة واقتصاد اسمها "المجتمع المدني وحقوق الإنسان")

عندي امتحان بكره ف مادة سلعوة كدا اسمها (الحماية الدولية لحقوق الإنسان) وإذا بي أفاجئ بدور سخونية متقولش لعدوينك عليه ، ودوخة ايه وصداع ايه وزغللة ايه ، عادي يعني بتحصل دور برد ، والدكتور لما جالي البيت مشكورا أكدي لي انه دور برد وهيروح لحاله بس لازم ألتزم بالراحة التامة ، قولته لا يا حلاوة دا أنا عندي امتحان بعد بكرة ، بحلق في السقف شوية وهرش ف دقنه وسألني امتحان ايه . . . فلما قلتله حس ان الأمر جد خطير ، فقالي طيب واضح ان اللي انتي بتقولي عليه دا مهم ، عشان كدا هديكي حنقتين هما ساعتين زمن تناميهم وتبقي زي الحصان ، ايدي علي كتفك يا عم ، ماشي المهم خدت الحقن ونمت

تقولوا كتير ؟ ؟ ؟ لغاية تاني يوم الصبح حوالي 10 ساعات ، إلا وأقوم أبص ف المرايا ألاقي خير اللهم اجعله خير ، وشي مليان حبوب لونها أحمر وكتييييييييير ، ايه الهزار دا بقي ع الصبح . . . لقيت جسمي كمان مليان من الحبوب دي ، وبعدين دا هزار أكيد ، أبقي ف السن دا وتجيلي حصبة !!!!!!!!!!!!!!!!!!!!!!!! دي مهزلة : ( دا أنا هاقفل ربع قرن شهر عشره الجاي ، أواجه مصر ازاي ؟!!!!

المهم قولت أكيد دا م السخونية ، ماما حبت تقطع الشك باليقين راحت الشغل حكت لاصحابها قالوا لها لأ الموضوع دا ما يتسكيتش عليه ، عليك وعلي مستشفي الحميات هما اللي يعرفوا ف الموضوع دا كويس، ماما رجعت البيت بسرعة وقالتي يالا ع الحميات ، يالا يا ماما ، والحميات يا جماعة من اكبر اكبر اكبر -احم - وافخم افخم المستوصفات الحكومية المتخصصة ، رحنا ، دخلنا ع الممرضة أول ما شفتها افتكرت مريم السجانة بتاعة سجن القناطر ، وشها عليه غضب ربنا ، شخطت ف ماما من غير سبب وقالتلها فين التذكرة المهم "مين فيكوا اللي عيانة" بكل شجاعة قلتها "أنا" من غير ما تبص في وشي أصلا ادتني جهاز عجيب كدا وقالتي جملة غريبة جدا مافهمتهاش غير بعد 5 دقايق تقريبا " . . . من غير ما تبص لي قالتي . . . "تحت باطك ع العري" ؟!!! ، فين وفين بقي لما فهمت ان دا ميزن حرارة وانها قصدها ان أحطه يعني عشان أقيس حرارتي ، المهم انها اتنرفزت جدا لما قلتلها اني مش فاهمة . . .حاجة غريبة والله الممرضات دول يا أخي

ما علينا دخلنا للدكتور ، شكله ما قامش من ع الكرسي من سبع شهور ، ودقنه طويله وعنيه مليانه عماص والبالطو بتاعه مش نضيف ،م الآخر شكله سباك مش دكتور

أول ما بص ف وشي قالي انتي عندك حصبة يا آنسة ، خليكي بعيد هاكتبلك الدوا ، قالته طب ايش عرفك من غير ما تكشف ، انتفض بكل إباء وشمم وشخط فيا وقالي انتي هتعرفيني شغلي ولا ايه يا آنسه ، والله عال ، شاور لماما وقالها تعالي خدي الروشتة وخليها بره . . . خرجت وأنا بافتكر جملة أمل صاحبتي الآثيرة ليا كل يوم الصبح وأنا أكتم غيظي "حبيتي مصر انهاردة يا سمسمة " ،شابه ف سني يجيلها حصبة تحب مصر منين يعني

ما علينا شكلي بقي وأنا منقطة حاجة تفطس م الضحك ، يالا منجلكوش ف حاجة وحشة ، بس ياريت متخشوش المدونة وايدكوا فاضية


9 comments:

Bassma said...

الف سلامة عليكي يا سمسمة..طب و الامتحان ؟ هينفع تروحي تمتحني و انتي منقطه كده ؟ ولا دي طريقه مثاليه يطمئن بها المراقبون ان ما حدش هيهوب نحيتك يغش منك او يغششك ؟؟

Ahmed Rashwan said...

ألف لابأس عليكي يا سمسمة
أنا جبت معايا برتقان رغم أني بحب الورد
علشان كانت فيه فتوى وهابية من كام شهر أن اصطحاب الورد لزيارة المريض حرام!!ا
تذاكري الحماية الدولية لحقوق الإنسان يجيلك حصبة ؟؟
ربنا يجعل كلامنا خفيف عليهم :))ا
وبلاش حقوق الإنسان في مصر
خايف عليكي من إنفلونزا الطيور

مُرَاقِبْ مِصْرِي said...

سلامتك يا أحلى سمسمة في الدنيا من الحصبة ومن حقوق الإنسان... مال إنتي بس بحقوق الإنسان والحاجات الأبيحة دي ده حتى قيل في السلف الصالح أن حقوق الإنسان دي من بين ما ينقض الوضوء عند الحنبلية وتعتبر مكرهة عند الحنفية

:)

Simsima said...

Bassma
الله يسلمك يا قمر، كان لازم ألاوح الامتحان لأن دي تاني سنة أمتحن فيها الدبلومة ، السنة اللي فاتت أجلت عشان السجن. . .المهم بقي يوم الامتحان دا حاكيليكوا عليه بالتفاصيل وهاهلكوا م الضحك. . .

Simsima said...

film69
مشكرين ع البرتقان يا عم ،بس انتا جبته منين مش راح مع الشتا ، وبعدبن بقي الواحد طوا الشتا ما بياكلش إلا برتقان، الصيف بقي مليان فاكهة ، كان حقك تخش عليا بشقة بطيخة ساقعة ونص كيلو جبنه اسطنابولي. . .

Simsima said...

الحاج جرجس بنفسه ف مدونتني
ايه الهنا اللي احنا فيه دا يا عم
أنا عارفه يا عم حقوق ايه وانسان ايه ، الحاجات الغريبة اللي طالعنلي فيها بنات اليومين دول
خطوة عزيزة والنبي

Egypt Rose said...

سلامتك يا سماسم هو طبعاً انا بكلمك كل يوم وبطمن عليكي .. بس انا مطمنة جداً بعد ما قرأة اللنتي كتبتي .. هلكتيني من الضحك يا بنت .. واسلوبك حلو في الوصف .. حبيتي مصر النهاردة ؟؟؟ هههههههههههه
يا سماسم في فرق كبير بين مصر حبيبتي و الشعب الذي يسكنها منهم مصريين بيحبو مصر اللى هو احنا .. ومنهم مصريين بحكم العيشة في بلد بيكرهوها ومخربنها وياريت كل واحد يرجع من الحتة اللى هو منها ويسيبو مصر للمصريين الحقيقيين اللى بيحبوها .. اللى جاى من الخليج يرجع و اللى نازح من الريف يرجع .. واللى جاء من ايران يروح ..زمان كان في مصريين بيحبو البلد وبيعملو ثورات و يتعلموا في الخارج .. وبيحاربوا علشان الثقافة .. وكان يا مكان .. ما بقاش منها غيرنا احنا وحبة ناس منقرضين عيشين وكمان مش سايبنا في حالنا .. يعني بالعربي وعلى راي اللبنانيين .. حلو عنا بدنا نعيش ..

أجمدي شويه يا سمسمة ومين هيحب مصر معايا

radwa osama said...

سمسمة الجميلة ..الف سلامه يا قمر ..يا رب الدكتور المتخلف اللى خايف يتدعدى

منتديات said...

Thanks for your

منتديات

زفات العروس

دردشة

شات

شات صوتي

مواضيع اسلامية

مواضيع عامة

Department of English Language

مكتبة مجنونات

أخبار الحوادث و الجرائم - اثارة

الترحيب و التعارف

همس القصيد

الخواطر وابداع الاقلام

Stories - قصص - قصص قصيره و الألغاز

الحياة الزوجية

عالم الرجل - ازياء - موضه - ماركات

ازياء واكسسورات

مكياج وشعر

ديكور - أثاث - غرف نوم - مطابخ - حمامات

صحة - طب بديل - تغذية - أعشاب - رجيم - اطفالنا

الطبخ والمأكولات

الفن والفنانين

الفيديو والافلام

الصوتيات و المرئيات و الفضائيات

الأغاني و الفيديو كليب

مقاطع الاغاني , اغاني

صرقعة و تنكيت وضحك

العاب الكمبيوتر اثارة

مسنجر - برامج ماسنجر - توبيكات

توبيكات

صور - كاريكاتير - مناظر

الرياضة والرياضيين

السيارات Motorcycles - Cars - سيارات - دراجات

سياحة وسفر

تطوير المواقع ، هاكات و سكربتات

الكمبيوتر و الإنترنت

بلوتوث - مقاطع جوال - فيديو الجوال

تصاميم و جرافكس - فلاش - سويتش - دروس

اسماء ومعاني

العاب فلاش

مكتبة البرامج

ماسنجرات

حكم وامثال

اسلاميات

المركز الاخباري

صحف ومجلات

تداول الاسهم

دليل المواقع

قصائد مسموعة