محاولة أخيرة للم الشتات

إلي كل من يهتم لأمر هذه البلد:
إلي شباب من أجل التغيير 1
وشباب من أجل التغيير 2
وشباب الكرامة والغد والاشتراكيين الثوريين والاشتراكيين المصريين والعمل والناصري والوسط والوفد والإخوان 30 فبراير والمدونين
وكل الشباب اللي ملهمش دعوة باللي فوق دا كله، بس عندهم رغبة حقيقية في محاولة لتغيير الواقع المهبب اللي احنا عايشين فيه
دعونا نتجاوز للمرة الألف -بعد المئة الإولي- الاتهامات المتبادلة بين فرق الشباب المتناحرة والمزايدات وحب الزعامة والتشكيك في نوايا الآخر طول الوقت ، والتكتلات والانقسامات "وأبوكوا السقامات"
تعالوا نتقابل علي أرضية واحدة هي الهموم المشتركة، عندنا بلاوي متتلتة مش هينفع نواجهها واحنا عاملين كدا، طول ما احنا كدا مش هنحقق أي حاجة لينا ولا للأجيال اللي بعدينا وهنتلعن ألف مرة من ولادنا ان احنا حتي محاولناش نركن خلافتنا الشخصية وتنازل عن ذواتنا عشان نحاول نغير
فاكرين زمان في بداية شباب من أجل التغيير ، لما كان الاجتماع بتاعنا بيتجاوز ال 100 أحيان كتير، كنا بنقدر نعمل حاجات حقيقية في الشارع ، لكن دلوقتي كل 10 بيشتغلوا لوحدهم، دا فضلاً عن ان ناس كتير جدا - منهم أنا- محبطين وقاعدين في بيوتهم يلعنوا أبو البلد. .
وبعدين . . نعتقد ان دي أخر محاولة للم الكيان ، متيهألي بعد المحاولة دي مش هنحاول تاني، لأن هيبقي الأسهل ان احنا نعمل حاجة من أول وجديد.
تعالوا نتقابل بروح مختلفة ويبقي همنا الحقيقي مش تصفية خلافتنا ، ومش ان اننا نتهم بعضينا

ندعوكم للإجتماع يوم السبت القادم الساعة 6 مساءًا بمقر مركز العدالة"الاشتراكيين المصريين" العنوان. . 3 ش عبداللطيف الصوفاني متفرع من ش شريف أمام عمارة اللواء، علي بعد 3 دقايق من قهوة البورصة

معاً نحن أقوي

أسماء علي
رشا عزب

مملكتي ليست من هذا العالم