Thursday, October 26, 2006

تعليق مبدئي علي ماحدث بوسط المدينة

يا أهل مدينتنا
يا أهل مدينتنا
هذا قولى :
أنفجروا أو موتوا


لن ينجيكم ان تعتصموا منه بآعالى جبال الصمت او ببطون الغابات
لن ينجيكم أن تختبئوا فى حجراتكم
أو تحت وسائدكم أو فى بالوعات الحمامات

Thursday, October 12, 2006

Happy Birthday to me!!!



زي انهاردة من 24 سنة شرفت جنابي في الدنيا العجيبة دي، وكل سنة تعدي أبص في المرايه بإندهاش متكرر وأسأل نفسي سؤال وجودي عميق"هوا أنا ايه اللي جابني هنا ؟!!!!!!!!!!!!!!" ، عندي احساس غريب ان انا بقالي كتير أوي عايشة ، وعلي رأي عمكوا عبد الوهاب "جئت من حيث لا أعلم ولكني أتيت!" وعلي رأي عمنا كلنا جاهين :
مرغم عليك يا صبح ،مغصوب يا ليل
لا دخلتها برجليا ولا كان لي ميل
شايلني شيل ،دخلت أنا في الحياة
وبكرة هاخرج منها شا يلني شيل
عجبي!
وبهذه المناسبة الكونية العويصة اللي ما بتتكررش في تاريخ البشرية وأحب أنوه يعني ان اليوم دا مش أي يوم حيث ان هو عيد ميلاد الزلزال مش بس عيد ميلادي، الزلزال كان برضه في 12/10/1992 وأنا 12/10/1982، مش أي حاجة يعني . . .
واسمحوا لي أهدي نفسي الأغنية دي في عيد ميلادي. . . . . .

Monday, October 02, 2006

الأراجوز يا اخونا. . . .

باحب الأغنية دي جداً، وبعدين لما ربنا فتح عليا بالـ "دي إس إل"، عقبال يا رب كل السامعين، قعدت أنعكش علي الأغاني التايهة مني، وإذ فأجأة، لقيت الأغنية يا ولاد، أغنية لطيفة جدا ،سيد حجاب مبهر كالعادة، وألحان عمار القريبة معظم الوقت،هوا بس لو يفكه من تلحين أغاني للريس هيبقي حاجة عظيمة فعلاً، والأداء الحقيقي لعمر الشريف. . .والفكرة كمان مصرية حتي النخاع، حيث أن الفن الشعبي وعلي رأسه الأراجوز من أهم الميكانزيمات الدفاعية لشعبنا المغلوب علي أمره معظم الوقت. . .قشطة عليكوا رمضان كريم ، ومش مبارك ولا حاجة، أنا أسفة اني بقالي كتير مش بأكتب، قال يعني حد مهتم. . . .
المهم اسمعوا الأغنية وقولوا لي رأيكوا
أغنية أراجوز - من فيلم الأراجوزكلمات: سيد حجاب
ألحان: عمار الشريعي
أداء :عمر الشريف


أراجوز .. أراجوز .. إنما فنان
فنان .. أيوه .. إنما أراجوز
و يجوز يا زمان أنا كنت زمان
غاوي الأرجزة طياري .. يجوز
إنما لما الكيف بقى إدمان
باجي أبص لشيء واحد أرى .. جوز
أرى إيه؟ أرى إيه؟ أرى أرى أراجوز
***
فلسان .. كحيان .. أيوه أنا فلسان
إنما برضك .. راجل إنسان
بأضرب بالألف لسان و لسان
و باكلها بعرقي .. و مش إحسان
راجل و الرجولية لا عضلات
و لا ألابندة و سيما و حركات
الرجولية الحقيقية ثبات
قدام جبونية أي جبان
****
أراجوز أنا و أحمي أرى أرى إيه؟
أحمي قراريط الناس من مين؟
من الناس الأرى أرى إيه أرى إيه؟
من الناس القراميط الملاعين
ماهو أصل أنا مش من الأرى أرى إيه
مش من القراطيس
و لو الحال مال مقعدش أنا على
أرى إيه أرى إيه؟ .. قرافيصي و أطنش ع الأندال
لازم أشك الأندال مهموز
و أدوس ع اللي افترى و العنطوز
م أنا أرى إيه أرى إيه؟؟ أرى أرى أراجوز
****
أراجوز .. و شجيع .. و الدنيا ميدان
فارس .. حارس .. واقف ددبان
و إذا بان للشر نيبان و زبان
باحمي الغلبانة و الغلبان
و شجاعتي ماهياش في الطاخ طيخ
دي شجاعة تفكير و تماخيخ
الأرض أضربها تجيب بطيخ
بذكاوتي و أخللي الخلا بستان
****
أراجوز أنا .. و الدنيا أرى إيه؟
قرشانة و احنا شبر شبيط
ياما قرمتني و أرى أرى إيه؟
قرصتني ف لباليبي و أنا كبير
فسرحت أنفخ أرى إيه أرى إيه؟
أراغيلها و أغني يا ليلي يا عين
و أتمسخر على أرى إيه أرى إيه؟
أراذلها الفجرة الطماعين
و أضَّحَك كل صبي و عجوز
ع اللي بيتنطط فرقع لوز
مانا أرى أرى إيه؟ أرى أرى أراجوز
****
أراجوز .. و سايقها هبل في جنان
و أنا قلبي .. ملان جدعنة و حنان
و أبان ساهي سهتان سهيان
إنما عقلي للعدل .. ميزان
أنا فلتة .. إنما مش فلتان
و ساعات حرنان .. و ساعات زنَّان
يمكن علشان وحداني .. ما ليش أراجوزة تاخدني بالأحضان
****
أراجوز أنا .. و أقدر أرى أرى إيه؟
أراعيكي و أشيلك في عيوني
و إذا مرة زعلتي أرى أرى إيه؟
أراضيكي بعقلي .. و بجنوني
حُطِّي من السما على أرى أرى إيه؟
أراضيّه و اسلِّم لِك أمري
و كُلِي معايا في أرى إيه أرى إيه؟
قروانتي يا كروانة عمري
و بَدَل مانا كده ملوي الَبَزبوز
أصبح لك جوز معزوز محظوظ
إيه يا ترى إيه؟ أرى أرى أراجوز
أرى إيه؟ أرى إيه؟ أرى أرى أراجوز

كلمات الأغنية نقلاً عن مدونة الأغاني