Wednesday, October 15, 2008

منير يغني في عيد القوات الجوية وحزام عفة للسيدات ...يالهوي يا اما



والنعمة مؤامرة ، امبارح كنت مروحة مبسوطة أوي، بعد يوم بناتي أمور في سينابون المهندسين مع داليا ودنيا ورشا ، قررنا اننا نعمل فيها بنات المهندسين وكدا يعني ،قوم ايه بقي قررنا نروح سينابون ،حيث ان الحلم دا كان بيراودنا عن نفسنا أنا وداليا، المهم يعني سينابون دا أمور أخر حاجة، القعدة كانت لطيفة أوي ، فروحت بقي مبسوطة يعني وكون سعيد وكدا....روحت لقيت ماما كمان عامله أكل حلو أوي..فقلت ايه الحلاوة دي، المهم يا اصحاب قعدت اتفرج ع التلفزيون وجت ع الفضائية المصرية ، لاقيت منير ف حقلة لايف قلت بس دا كون سعيد بجد ، وكان بيغني يونس ، اقعد اتفرج مافيش ثانيتي الاقي الغراب مبارك قاعد، يانهار يانهار، لاقيت منير قال ايه بيغني في عيد القوات الجوية ، ووراه ع المسرح "إلي العلا في سبيل المجد" مصدقتش نفسي وجالي صدمة نفسية علي أساس العاطفة ، منير بيغني لمبارك زيه زي الحاج محمد ثروت، أحيييييييييييييه، كنت بتشال واتهبد قدام التلفزيون لدرجة ان ماما شكت ان جالي صرع....وراحت دماغ سينابون :(

المهم منير كان بيغني لجثث حوالي ست ترابيزات كتير والغراب قاعد ومعاه لفيف من الغربان، علي رأسهم الغراب النظيف الطويل، وقال ايه كان بيغني ببجاحته "يا عروسة النيل"،"الليلة يا سمرة ، " ويونس"قدام شوية عسكر وحرامية، منير كان بيدن في مالطة ، وكمان كان لابس قميص أبيض ومكوي كمان، كان بيغني من غير حد ما يبربش مش يصقف وينكت نفسه زي ما بيعمل في حفلة الأوبرا وفيه أكتر من 20000مواطن بيغنوا معاه،حسيت ان منير ساعتها عامل زي الأرجوز أو المهرج اللي كانوا بيجبوه زمان عشان يضحك السلطان،ما علينا نمت وأنا متنكدة ودمي محروق ، صحيت الصبح علي رأي جاهين شاعر براحة وصفا صحيت بدري الساعة 7 وكان اليوم لطيف جدا ، رحت الشغل يا اخونا عملت مج القهوة العظيم ومع سيجارة الصباح باشوف الفيس بوك ، ف الإنبوكس لاقيت مسج من
"كلنا ليلي"بيقول ايه ف العنوان"حزام للعفة غير قابل للصدأ"قلت دا أكيد افيه ، لاقيته بجد
دا كان لازم تشوفه عشان تعرفوا قد ايه الناس بتتعامل مع الستات بشكل منحط
في سنة 2008 لسه الناس بتفكر ف الست زي ما كان بيحصل في القرون الوسطي "أعلنت إحدى الشركات التجارية عن تسويق "حزام للعفة" كانت ترتديه المرأة في أوروبا في العصور الوسطى وذلك حماية لها من الاغتصاب."

صرحت صاحبة الشركة، بأن المستهلك المستهدف هو الزوج الذي يشك في عدم إخلاص زوجته له, وأولياء أمور الفتيات المراهقات . والمرأة التي تخشي وقوعها ضحية للاغتصاب.وأضافت أنها نجحت في الحصول على امتياز توزيع هذا النوع من أحزمة العفة في آسيا وفي بلدان الشرق الأوسط.
تخيلوا رجعنا للعصور الوسطي واحنا في القرن الواحد وعشرين ، لما كانوا الرجالة ساعة الحرب لازم يتأكدوا ان حزام العفة دا موجود عند مراته وقافله بالمفتاح ، وهو بس اللي معاه المفتاح دا ، تخيلو مدي الحقارة اللي وصلنلها...اللينك دا فيه تفاصيل الخبر...
http://www.alarabiya.net/articles/2005/09/28/17199.html
واتعكنن مزاجي للمرة التانية رغم تأثير سينابون العظيم....كتير عليا يارب :
يعني منير يغني للقوات الجوية وحزام عفة ف 2008 وعايزيني أكسبها
:(