Thursday, June 26, 2008

قربتي مني يا مدينتي


نفسي أوي أحس الإحساس دا ..نفسي أوي تقربلي مدينتي زي ما قالت مني عبد الغني في أغنية لحظة صفا في "فيلم الباشا" ، بقالي كتيييييير حاسه بغربة عن كل حاجة " القهوة ووسط البلد والحفلات اللي بحب أحضرها ومج القهوة بتاع كل يوم الصبح ، حتي جنينة الحيوانات والسيرك واصحابي الكتير وشغلي والأغاني اللي بحبها ، حتي صوت الست اللي بتبيع اللبن وهيا بتقول ..أبيض انهاردة أبيض .. الراجل البقال اللي تحت البيت وهوا بيصبح عليا ، وحنان بتاعة الجرايد وهيا بتناديلي في الشارع بإسم أخويا "ازيك يا طه" عشان بتتكسف تقولي اسمي في الشارع ، حتي الهتاف جوا المسيره برضه عيره علي رأي وجيه عزيز" ..
عارفين حتي اسكندريه "كل تفاصيلي معاها بقت بهتانة " محطة الرمل ،والمنشية ، ومحمد أحمد ، والقهوة عند البن البرازيلي والمشي علي الكورنيش والقلعة والمنتزه" مفيش حاجة بقت مدهشه ولا مفرحه زي زمان ، طعم الحاجات كلها بقي مر ..
حتي السينما مبقتش مفرحه زمان بأدخلها وبأخرج منها وروحي زي ما هيا ، مفيش حاجة بقت بتهزني ، نفسي أسمع مزيكا جديدة أو أتفرج علي فيلم حلو ، أو اقعد مع اصحاب قعدة مفرحه أو أهتف جوا مظاهرة من قلبي تاني زي الأول "
انهاردة سمعت الأغنية دي " قربتي مني يا مدينتي ..وعدتي من تاني حبيبتي ودوبنا في لحظة صفا" ، حسيت اني زهقانه أوي:(