Wednesday, December 21, 2011

حوارات مع مواطنين شرفاء



 تقول قلعوا بنت..يقول فوتوشوب..تجيبله فيديو..يقول تستاهل..تقول اعتبرها أختك..يقول ايه موديها هناك..تقوله ده مبرر للي حصل؟..يقول ماهي اللي لابسة هدوم خفيفة بتتقلع بسرعة..و كده تفهم ان اللى قدامك مواطن سلفي أو اخوان مبيقومش من ع الكنبة ومبيتفرجش عير علي تيفا العجيب..

تقول يسقط حكم العسكر..يقول عملوا لك ايه العسكر؟..تقول بيسرقوا الثورة..يقول هما اللي حموها..تقول حموها ازاي ومفيش ولا مطلب اتحقق ومبارك نفسه مبيتحاكمش..يقولك احنا بنبص لقدام..تقوله ما احنا لازم نحاسب الغلطان عشان قدام محدش يغلط..يقولك البلد بتخرب وعجلة الانتاج واقفة...و كده تفهم ان اللى قدامك مش عارف يرد فسيبوا عشان ضغطك ميرتفعش

تقول لا للمحاكمات العسكرية..يقول ليه ياعم احنا عايزين نخلص من البلطجية..تقول المجلس بيستغلها و بيسجن الشباب..يقول لا لا دول بلطجية...تقول ما تحاكمهم مدني عشان نعرف البلطجي من المظلوم..يقول لازم يتحاكموا عسكري عشان يحرموا..و كده تفهم ان اللى قدامك مواطن شريف كنباوي اصيل :)

تقول قتلونا في محمد محمود..يقولك دول مش ثوار..تقوله عرفت منين..يقولك كانوا عايزين يقتحموا وزارة الداخلية..تقول بس وزارة الداخلية مش في محمد محمود..يقول يبقي هما اللي بيستفزوا الجيش..و كده تفهم ان اللى قدامك ما بيقراش غير الأخبار والجمهورية..

تقول مليونية في التحرير..يقول العيال دي عايزة ايه؟..تقوله سرعة تسليم السلطة..يقول لا دول عملاء وبياخدوا فلوس وعايزين يسقطوا الجيش..تقول أنت روحت شفت؟..يقول آه يا أستاذة أمال ايه شفت...تقوله فين؟..يقولك علي التلفزيون المصري...

تقول اعتصام وطالبين حد أقصي وأدني للأجور..يقول كفاية بقي حرام...تقول ده عشانك وعشان الناس..يقول اقتصاد البلد بيقع..تقوله عرفت منين؟..يقول البورصة خسرت امبارح سبعتلاف مليار...تقوله طب يعني ايه اكتتاب؟..يقولك معرفش و كده تفهم ان اللى قدامك اكيد أكيد سواق تاكسي