Wednesday, June 21, 2006

وحشتوني . . .وحشتوني . . .وحشتوووووووووووني




الانترنت تاني ، أحمدك يارب . . .والله يا زملا الواحد كان حاسس انه هيودع قبل ما يشوف تاني الشبكة العنكبوتية الجميلة. . .طبعا أولا وحشتوني بشدة وبعنف وفي الحقيقة حاجات كتييييير أوي وحشتني ، وحشتني شوارع وسط البلد ، وحشتني شكل الأسفلت ، وحشتني الفاترينات وانا باتسكع ومش لاقيه حاجة اعملها ،وحشني علي الفاتح القاطن بقهوة افترايت ، وحشني فول سعد الحرامي ، وهزار عصام مهران اللي دمه خفيف ، وحشني ممر الجريون وأنا مخرمة منه وراحة علي هدي شعرواي ، وحشتني طعم ستلا وهيا ساقعة في عز حر الصيف وحشني عم سيد البارمان وسمعه التقيل ، وحشني حسام كاسب وقعدات البوح والفضفضة ، وحشني تمثال طلعت حرب اللي بحس ان مكانه في قلب مصر بالظبط ، وحشوني جروبي وانا عندي 4 سنين لما كنت باروح مع بابا واوقع الآيس كريم علي هدومي ، وحشوني شباب الغد- اه والله – وشعار المرحلة "اهتف اهتف م البلكونة" ، وحشني اليوناني مع اني مروحتوش غير يمكن مرتين تلاتة بالكتير . .وحشتني البورصة طبعا وعم فتحي ووشه السمح ، وحشتني قعدات البورصة ،وكل اصحابي اللي في طرة واللي بره ، وحشتني خناقات الاجتماعات العاصفة بتاعة شباب من أجل التغيير ،وحشني كمال خليل أوي ووحشتني ابتسامته اللي بتوهبني طاقة غريبة علي مواجهة كل العفن اللي احنا عايشين فيه ،وحشتني رشا جدة وآدائها الطفولي ، وحشتني داليا عبد الحميد وكلامي معها عن الفن والروايات والحياة "ساعات باحسها شبهي وساعات لأ"،وحشني أوي الواد شرقاوي ولسانه الطويل وقلة أدبه وطيبته ،وحشني ياسر جدا وكلامنا الكتير عن كل حاجة في الدنيا، ,واحشني رجب وأحمد سيف وعادل واسيلي ولجنة الاعاشة ، وحشني اسانسير هشام مبارك،وحشني كل الشباب اللي في طرة ، وحشني علاء مووووت وكنت حاسة بندالة رهيبة لما طلعت وسيبته بس اهو عملها وطلع انهاردة . .وحشني بهاء موووووووووووووووت وقعدات الصراحة راحة اللي كنا بنعملها في اكسلسيور ،وحشني الواد مالك وترقيتي عليه هوا والحزب بتاعه ،وحشني عمرو عزت بهدوئه المعتاد ، وحشني الواد وائل عباس مصوراتي الحركة ،وحشني أوي احمد عزت ونفسي اتكلم معاه ، وحشتني عنين نورا يونس الملونة ،وحشني طعيمة بحنانه وجدعنته المعتادة ، وحشتني نرمين وخفة دمها ، وحشني تامر وتفاؤله اللي من غير مناسبة ،وحشتني جيجي بقلقها . .وحشتني باهو وتوترها ، وحشني الواد أحمد سمير الواد القصير الجدع , وحشني أوي أوي الشيخ محمد عبد السلام وبيته الجميل في شبراويش في المنصورة نفسي اشوفه فعلا الراجل دا ،وحشني عصام وهاني وامل وغريب ومحمد وابراهيم ،وحشني الواد طلبة الجميل ،وحشني هاني ابو هاشم وهجومه الشديد عليا واتهامي باني مجنونة ،وحشني وانا الصبح في الشغل باشرب النسكافيه بتاعي وباقرا في المدونات ،وحشوني العيال بتوع الفخار اللي باشتغل معاهم في كوم غراب ..وحشني رصيف نادي القضاة . .وحشني شارع عبدالخالق ثروت لما كان مليان برسومتنا ، وحشني اهتف ، وحشتني وشوش عساكر الأمن المركزي السمرا ، وحشتني سلالالم نقابة الصحفيين ، وحشتني قهوة الحرية وميلاد جرسون القهوة ،وحشني الواد رامي الصعلوك . . . . .وحشني الواد عمر قناوي وامبراطوريته التي لا تغيب عنها الشمس اللي هيا مكتبة سندباد يعني . .وحشني اروح أولع شمع في الكنيسة الجميلة اللي في شارع صبري ابو علم ، وحشني أكل مكرونة بالكبدة من عند بابا عبده وحشني أوي النيل نفسي اشوفه فعلا واقعد معاه كتير ،وحشني المدي نفسي ابص علي مدي نظري من غير حيطان ولا قضبان ولا اسمنت . .


وحشتني كل التفاصيل . . . .
Simsima
20-6-2006
Home

9 comments:

Anonymous said...

عمك جمل بيقولك حمد الله علي السلامة

أحمد said...

مبروك العودة و كل عام و انت بخير
و اهلا بيك مرة ثانية في الخراء الوهمى الاسطورى للقاهرة

مرة ثانية
كل عام و انت بخير
:-)

عمرو عزت said...

وحشتينا أكثر يا أسماء

مستني " تفاصيلك " بقالي فترة

ايه التفاصيل ؟

Anonymous said...

أنا معرفتكيش إلا بعد ما دخلتي طرة , و لما كنت بسمع اسمك كنت بفتكرك رشا عزب !

بس وحشتيني يا سمسمة !

Alexandra said...

الف حمد الله على سلامتك يا جميل

Anonymous said...

الف حمدلله علي السلامة يا قمر .....

Anonymous said...

Welcome back..

متأخرة يومين لكن معلش فقدت الأمل أشوفلك بوست تاني عشان كدا مكنتش بمر...

في تفاصيل عن اللى حصل جوا؟؟

ولا أقلك...بلاش نتكلم في الماضي...

ولكم باك لحياتك

Anonymous said...

Love you ya simsima.. now we have seen yr world with its details.. enjoy them.. w 7amdela 3al salama

Anonymous said...

حمدالله علي السلامة يا سمسمة

مكنتش اعرف ان انتي اسماء علي لكن لاحظت غيابك عن النت و عن البلوج فقلقت
الحبس للجدعان .. و علشان عيون البلد ندفع تمن وقت و تعب و دم

أحمد