Thursday, July 06, 2006

إلي شرقاوي . . جواب مسجل بعلم الوصول



وتنفتح بيك القضية
والاتهام
قد إيه بتحب مصر
ياااه .. كل دا كان اتهام
إيه تخسره
عشرين سنة . .ثلاتين
ولا يهمك
تلج الحديد بيدوبك عشق في وطن
ولا يهمك
م نار العساكر
اللي شابه م البيادة
كل مادا بتلسعك
فاكر لما صاحبك مال عليك
يتدفى فيك
والكتاف السودا في الممر
بتقتل كل بصة
تترمي مع كل همسة
لسه فاكر رعشة أمك
لما قالوا يومها خاين
مع إنها دايما تشوفك
عصفور وطاير في الجناين
يومها وقعت من ملامحك
ضحكة الشاطر حسن
وانتفض جوه عروقك
ماسكة القيد الحديد
والقصايد اللي غنت فوق لسانك
في المظاهرة
رعشة الإيد
اللي خايفة
تنسند على جرح فاير
بصدمك شارع الجامعة اللي ثاير
من تحت عرق الأومباشية
والقنابل
لسه قايده في العيون دخان شجن
هو دا كان الوطن
لما نصبوله المحاكمة
كام شاويش
لما اتنده اسمك في قايمة الاتهام
بدأ السلام العسكري
نزلت دموعك فوق شفايفك
فيها طعم مية النيل الوفي
يومها انفتح جرحك على عين الجميع
زعرد بدمه على التراب
كنا صحاب
ماسكين بطوق الحلم ليهرب مننا

يا عم شرقاوي وإحنا بنطل سوا
من فتحة النور الوحيدة على البشر
جوة الشوارع
راكبين عربية الترحيلات
كل الأغاني اللي قولناها بالساعات
لسه فاكر
لما لفوا بيك ميدان السيدة
وسيدنا الحسين
البنادق جوه صوتك
والبيادة على الجبين
كان لصوتك على السلالم
والتراب بيحني رمله من عينيك
صوت شكوة النيل الفقير
من طول السفر
يا عم شرقاوي
يومها دموعك نضفت جرحك
من كل ظباط المكاتب
لا سبت دمك ع البلاط
ولا يومها بطلت غنا
ولا عمرك هتبطل غنا
ولا عمرك هتبطل غنا



وحشتني أوي يا شرقاوي . .أوعي تكون فاكر اني نسيتك لحظة ، أنا قلبي موجوع عليك جدا ، وبجد علي عيني يا صاحبي اني مش بازورك ولا عارفة اطمن عليك ، وكمان مش مطمنة عليك وانت لوحدك في السجن ، معلش يا شرقاوي اجمد ولا يهمك يا سيدي انت اقوي من اي سجن ، أنا واثقة فيك وفي انك هتتجاوز الأزمة دي وانت أقوي بكتير واصلب بكتير ، حاول تستغل الوقت دا في القراية واكتب كتيير ، اكتب مشارعيك المؤجلة اللي انت كنت دايما بتحكي لي عليها ، لازم تخرج من السجن وانت كسبان كتير،لازم تبني نفسك بجد.
أنا من ساعة ما خرجت من السجن وانا محبوسة في بيتنا و مابنزلش خالص ، الدنيا مأزمة شوية في البيت ،حتي مش بانزل اعمل اي حاجة غير مع ماما أو بابا ،عموما اوعي تزعل مني ، علي عيني والله ، أقولك علي حاجة ماما بتدعي ليك طول الوقت ،من ساعة ما قريت اللي انت كاتبه وهي بتقولي انها صعبانه عليها مامتك أوي وعارفة النار اللي في قلبها كويس عشان حسيت بيها ، وكل شوية تسألني عليك وتقولي هيتعرض امتي وتدعي ليك ، لما عرفت انك اخدت تجديد اخر مرة ،قعدت تدعي علي الأمن وعلي مبارك وتدعي لمامتك انه يصبر قلبها ، بالمناسبة مامتي عايزة تكلم مامتك لو ينفع قولي وابعت لي نمرتها واهو ماما تحاول تهون عليها شوية .
عموما يا بطوط خلي بالك من نفسك كويس فيه ناس كتير اوي بتحبك وكلنا فاكرينك طول الوقت ، وبقيت ستار يا عم شرقاوي وبقي ليك تشيرتات ومين عارف ممكن كمان عشرين سنة ولا حاجة نلزق صورتك ع المكيروباصات زي عمك جيفارا
يا ريت يا شرقاوي تكتب كل احاسيسك وتدون كل التفاصيل اللي بتعيشها ، دا مهم جدا ما تبطلش كتابه ، حتي لو حاجات تافهة وهايفة.
وياريت تبعت لي يا قمر و تحكي لي انت اخبارك ايه عايزة اطمن عليك ،بتعمل ايه في يومك ، حالتك النفسية شكلها ايه ، احكي لي زي ما كنت دايما بتنهار وتعترف ، قولي بتحب مين اليومين دول ، وكدا يعني !!!!
بجد واحشني جدا ، واحشني قلة ادبك وتليفوناتك الصباحية وانت بتسب وتلعن في خلق الله ، وحشتني تريقتك علي كل حاجة ، وحشتني القصص الحريمي تبعك .
مستنياك تخرج أصلب من الأول بكتير.
وزي ما بعت لك قبل كدا رباعية جاهين هابعتهالك تاني. . .
خوض معركتها . .زي جدك ما خاض
صالب وقالب شفتك بامتعاض
هيا كدا ماتنولش منها الرضا
غير بعد صد ورد ووجاع مخاض
عجبي!

Take care
Hope really we could meet soon
Simsima
5-7-2006

4 comments:

Anonymous said...

أزيك يا سمسمة؟

أنا عارف أن أنا وحش و مقصر ولا بتصل، و لا ببعت ايميلات أو تعليقات، بس أطمني أنا قاعد برتب خطة تهريبك من حبسك الجديد، في نفق بيتحفر تحت بيتكم دلوقتي، و رصدنا تحركات الوالد و بنفكر نخطفه، و لو استدعى الأمر هنحاصر البيت بالدبابات

أنت مرتبة مع حد يوصل الجواب ده لشرقاوي؟ و لا نتصرف أحنا؟

Anonymous said...

hi asmaa.plz if u can get to sharkawy tell him that there are alot of people who are very proud of him and praying for him and waiting for him although he doesnot even know them.tell him yshd 7elo we west elbalad mstaniea.

SOLITUDE® said...

كلنا معاك يا شرقاوي وبندعي لك
شد حيلك يا بطل

Simsima said...

ازيك يا علاءو ازي منال
واحشني خالص، ونفسي اشوفكوا قريب ،وبخصوص النفق أنا بدأت الحفر أنا كمان، قشطة جدا هيبقي عندنا نفقين واهو بالمرة لما اخرج الحكومة توصلنا مترو، أنا قلت لمالك بس لو انت هتعرف تتصرف يبقي لطيف عشان اضمن ان الجواب يوصل لشرقاوي، لأنه بعت لي ان هوا زعلان مني جدا عشان مش بازوره،وانت عارف اللي فيها
الكونت دي مونت سمسمة