لساك بتقدر تحب ؟

1 –
لساك بتقدر تحب
لساك بتقدر تضحك على أي حاجة بتجرحك
وتخبي ليلة عيا طويلة في حضن أول طيف يجيلك
لساك بتقدر تكون زى كولومبس وتراهن على المفيش
لساك بتقدر تعيش

2 –
مش أنت بس لوحدك بتحب تكتب شعر
وتتأخر علشان تستمتع بخبطة خطوتك
وهي بتدب في قلب سكوت الشارع
مش أنت بس لوحدك بتندهش من ليلك القصير
اللي بيخبي وراه قلب هيتعب بسرعة من نهار طويل
بتزعل ؟ أكيد
لكنك دايما ما بتقدرش تختصر مسافة حزن كبيرة
في ورقة من عشرين سطر
بتفرح ؟ أكيد
لكنك ما بتقدرش تخفي شكوكك وخوفك
من نهاية قصة حب مش هتطول أكتر
من اكتشافك بإن الوقت بينسرق منك
وإن نهار مقلق بيستناك بكل الوشوش
اللي بتتمنى من كل قلبك ما تشوفهاش
بتحبها ؟ أكيد
زي البحر ما بيحب الوداع
زي الفنار ما بيعشق شوفة المراكب في البعيد
فيروز تغني
لوجع المواني اللي كل يوم جواك يزيد
تبعد وتكره كل يوم بتشوفها فيه
تبعد وتكره كل يوم حبيتها فيه
بتموت ؟ أكيد



محمود العدوي
17 / 7 / 2006