هتوحشيني أوي يا مونيكا

يمكن قابلتها في حياتي تلت أو أربع مرات ، مونيكا بنت ضحكتها زي السما من الناس اللي تحس بيها طيف كدا ، مسيحية متدينة عرفتها عن طريق شادي زميلي في الشغل ، من شباب مدرسة الجيزويت في المنيا، كان فيه بينا اصحاب مشتركين كتير،مرة جات الشغل وقعدنا مع بعض اليوم دا كتير أوي اتكلمنا ف حاجات كتير أوي، وبعد كدا قررنا ننزل وسط البلد عشان نكمل اليوم، نزلت أنا وهيا وشادي ورحنا قابلنا عادل واسيلي في الحرية،وبعد كدا رحنا اتغدينا سوا وكانت مبسوطة أوي اني عرفتها علي مطعم بيعمل ملوخية في القاهرة ....

بعد كدا عرفت انها بتعمل حاجات كل اصحابها بيشوفها غريبة زي مثلا تروح السودان أ والسنغال تقد هناك شهرين تلاته عشان تساعد ناس هيا متعرفهومش ولا فيه بينها وبينهم أي صله ،تتطوع مثلا ف حاجة ليها علاقة بمرضي الإيدز، تروح مدرسة فقيرة عشان تعلمهم الرسم.
مونيكا فجأة ماتت..................................................................
بعد كل دا مونيكا ماتت مش هيا لوحدها ، وكمان حوالي13 ولد وبنت وفيه أكتر من 30 مصاب بإصابات خطيرة عشان اتوبيس اتقلب بيهم كانوا رايحين اسكندرية من المنيا.
الموت فجأة دا حاجة مرعبة ، ليه حد زي مونيكا يموت بالطريقة،مبقتش مستحملة الناس تختفي من حياتي بالطريقة دي :(