المظاهرة بعد صلاة المغرب :)

بقالي كتير أوي ما اخدتش قرار اني أنزل مظاهرة لأني شوية بقيت شايفه الحاجات مختلفة وان المظاهرة مش أهم حاجة ممكن الناس تعملها، ربكوا والحق وحشني أتظاهر وحشني أهتف من قلبي،من امبارح وأنا باتابع اللي بيحصل لأسطول الحرية ولما الصبح لاقيت الأخبار بتتوالي ما بين هجوم علي الأسطول وقتلي ودول محترمة بتطرد السفرا الصهاينة ودول عربية عايشه ف المهلبية...حسيت اني عايزه بجد أنزل مظاهرة وكنت عارفه طبعا ان الفيس بوك هيحلهالي..مظاهرة الساعة 1 ظهراًأمام وزارة الخارجية...فل جدا ..نزلت م البيت ولبست لبس المظاهرات..وتوجهت إلي حيث المكان الموعود..استغربت أوي ان الطريق ماشي تمام جدا علي الجانبين ومفيش أي مشاكل مرورية لدرجة ان أنا شكيت في المكان..وأنا باعدي الشارع مكنتش مصدقه نفسي كانوا المتظاهرين حوالي 40 أو 50 علي أقصي تقدير وأصوات هزيلة حسيت كأني باتفرج علي سيت كوم بيقلد المظاهرات الحقيقية بس الإنتاج معجز معاهم فمش عارفين يجيبوا مجاميع كفاية ، دخلت الكردون مع صديقي بهاء قسمنا علم فلسطين سوا ، ولاقيته بيطلعلي استيكرز مكتوب عليها حاجات من نوع"قاطعوا" و "فلسطين عربية"قلت تمام جدا، بس لاقيت البوستر اللي بعده حسن نصر الله..قلت بقي لأ أهو كله اللي كدا،نصرالله ايه بس في الحر دا،المهم شفت وشوش كتير باعرفاها بس فيه حاجة كده شاحبة ومصفره حاسه كأنهم بيمثلوا مسرحية ودي ليلة العرض الألف ففقدوا كل احساس ليهم بالعرض..زي الكومبارسات اللي مش بيحبوا الشغل.حاجة تحزن جدا
كمال خليل..طبعا بالنسبة لي ظهوره كفاية جدا عشان أحس بأهمية اللي بيحصل ، ظهر فجأة قلت تمام البني أدم الوحيد اللي ممكن أرد وراه الهتاف من قلبي..حتي كمال بقي بهتان :( بس مش هوا دا المهم كمال بينهي المظاهرة وبيقول في وقفة بعد صلاة المغرب؟!!!!!!!!!!!!!!كمال بيقول معاد المظاهرة مرتبط بمواعيد الصلاه:)حاجة فل جدا وعرفت طبعا ان المظاهرة بتاعة بعد المغرب دي اخوان بالقطع:((
. عشنا وشفنا الشيوعيين يحددوا مواعيد المظاهرات بمواعيد الصلاه ..حاجة محبطة بجد

فلاش باك..جامعة القاهرة..2000

مظاهرات طلابية عظيمة الشأن ضد إسرائيل وترفع مطالب غلق السفارة وطرد السفير الإسرائيلي..محاولة من طلبة الجامعة بالضم علي طلاب المدرسة السعدية..مشهد جانبي مجموعة من الطلبة ينضموا لأهالي بين السرايات الذين بدورهم يقومون بوضع متاريس أمام عربات الأمن المركزي...بجوار القبة الآلآف الطلاب يرددون أول مطلب للجماهير ،قفل سفرة وطرد سفير، واصحي يا طالب مصر يا مجدع...أهتف من قلبي يا فلسطين ويا فلسطين، مهما تمر سنين وسنين، مهما يشدوا الطوق ع الرقبة ،مهما يزيد عدد الزنانين، وأشعر بإحساس غريب من أن أعداد هائلة تردد ما اقوله ورائي..قوات الأمن ترد علي هتافتنا بقنابل مسيلة للدموع..نهتف وعيوننا وحلوقنا ملتهبة(يا أهالينا يا أهالينا...يا أهالينا ضموا علينا)..تأتينا أخبار عن سقوط السقا شهيد في جامعة الإسكندرية من جراء اطلاق الرصاص عليه من الأمن..تشتعل قلوبنا ونهتف إلي أن تبح أصواتنا....كل هذا مر من أمامي كشريط السينما وأنا أتابع المسرحية الهزلية وأترحم علي أيام زمان