والله يا جدعان قعدت ادور علي حاجة أقولها عن القمة - لامؤاخذة - العربية ملقيتش أحلي من القصيدة اللي كان كاتبها الفنان الجميل "خالد الصاوي" عن قمة من القمم اللامؤاخذة يعني العربية . .
غزل لأهل القمة
(مهداة لقمة بيروت..
ولكل قمة عربية!)
(مهداة لقمة بيروت..
ولكل قمة عربية!)
وحشتني القمة العربية وكلامها الحلو الكداب
وعيونها المايصة العسلية وقرار الشجب الخلاب
وإيديها النونو بتتعفرت وتدق جميع الأبواب
والصوت السيكا بيغرد ويلقح ...لكن بحساب
وادي يا بني فرق التربية
وادي قمة ما يغلبها غلاب
حبيتها علشان رقتها حبوها معايا يا أحباب
القمة المزة العربية وفحولها شجر اللبلاب!
وحشتني النخوة الشربتلي والكرافتات الممضية
والشعر المصبوغ والغنجة واللغوة والديبلوماسية
وبيان الفتحة والقفلة ولا الأحاديث الجانبية
يا اخواتي عليها اما تهدد وتحدف قطن وحنية
وتخاصم ...لكن من برة ما كفاية السحنة الملوية
أهي دي اللي تعيش يا بلدينا شارية ومكسوفة وعشرية
ما هي بنت ذوات مصروف فيها قوت الملايين الفقرية!
وحشتني خلاص انا مش قادر
ودوني يا عالم بيروت
أتملي من البشرة الناعمة وأملس ع الخد التوت
وافديها بروحي من الحاقد واديلة خمسين نبوت
قال يعني مش عاجبه صفارها علي ايه بتلوم الكتكوت؟
!يجرحها عشان متربية باصة في الأرض مفيش صوت؟؟
الله لا يسامحك يا جاحدها
يا مبجح فيها يا سفروت
وتعيش القمة العربية لو حتي العربية تموت !!!!
4 comments:
هاهاها
مش بطالة
ألف ألف مبروك علي الإفراج يا ست أسماء
أوعي تكوني إنهزمتي مستنينك في الشارع قريبا
وإنشاء الله عقبال رشا وندي وكمال وباقي العصابه يارب
مبروك علينا رجوعك، بجد مافيش اى كلام ممكن يتقال يوصف شعورنا نحوكم، لكن يمكن "غنى يا بهية" تكون تعبير بسيط مننا عن مشاعرنا
هانستناكى الاربعاء
ياصاحبة التفاصيل ... التفاصيل هنا
http://taranim.wordpress.com/3ani-ya-bahyya/
شكرا جدا يا جماعة بجد لكل الناس اللي كانت مهتمة ، متعرفوش دا فرق معايا قد ايه ..نفسي اشوفكوا كلكوا لسه في الحقيقة محبوسة علي ذمة قضية منزلية...بس علي مين . . .
عمر السجن ما غير فكرة ،عمر الحبس ما آخر بكرة
Post a Comment