Thursday, March 10, 2011

الشعب والشعب .. هيفضل إيد واحدة



ما هو ما ينفعش نسيب البلد دي تروح من إيدينا تاني بعد ما راح من اننا كل دول وناس هتعيش بعاهات مستديمة طول عمرها...احنا دفعنا دم في الثورة دي ومينفعش نسيب البلد تروح من إيدينا ...فوقوا من أوهام الطائفية ..أمن الدولة لسه صاحي وبيلعب...زي ما الداخلية فتحت السجون عشان الناس تحس بالذعر ويروحوا يبوسوا رجليهم عشان يرجعوا يدوسوا علينا تاني...أمن الدولة بتلعب بالكارت اللي بتعرف تلعب عليه كويس الفتنة الطائفية..مينفعش بعد ما بقينا متأكدين ان كنيسة القديسين وراها الداخلية وحادثة سمالوط وكل أحداث الطائفية دي مش حقيقية بدليل ان وقت الإعتصام في التحرير من 25 يناير لغاية 12 فبراير مفيش طوبة اتضربت علي كنيسة بالرغم من ان مكنش فيه حتي عسكري مرور في الشارع .

شوارعنا وبيوتنا وكناسينا وجوامعنا احنا اللي حميناها ..لجان شعبية في كل شارع وحارة فيكي يا مصر شباب زي الورد، سكان الشارع اللي عمرهم ما كلموا بعض بقوا بيتكلموا ويشربوا شاي بالليل ويولعوا نار يتدفوا سوا، صلاة الجمعة اللي كان بيحمي اللي بيصلوا مسيحين وقداس الاحد مسلمين ومسيحين كانوا فيه بيرددوا التراتيل.. أنا بعيني شفت ساعة الفجر راجل بدقن بيتوضي وبنت مسيحية هي اللي بتصب عليه الميه..مينا سمير صاحبي المسيحي الجدع بتاع العمرانية كان بيدخل حمام جامع عمر مكرم والشباب اللي واقفين علي باب الجامع لما كانوا بيشوفوا بطاقته بيتبسطوا جدا ان فيه ولد مسيحي داخل الجامع ومش حاسس بفرق..

مرة في قداس في التحرير سمعت جملة عبقرية من أسيس لما كان بيتكلم مع المعتصمين بدأو يهتفوا "إيد واحدة .. إيد واحدة" سكتهم وقالهم احنا مش علي راسنا بطحة احنا ايد واحدة غصبن عنهم ومن غير ما نهتف ايد واحدة.

عمر ما حد سألني علي اسمي ولا ديني ولا حتي انتمائي السياسي في ميدان التحرير ولا حتي في امبابة 25 ينايرولا ف مصر القديمة يوم 28 يناير ، مبحبش اسميها أخلاق الميدان دي بجد أخلاق المصريين الحقيقية.

راح فين كل دا .. رجعنا تاتي لنغمة مسلمين ومسيحين وأقلية مضطهدة والمادة 2 ...يا جماعة احنا عدينا مرحلة صعبة بس اللي جاي لو ما فوقناش هيبقي أصعب.

بيشغلونا هما بالحوادث الطائفية والخناقات دي ، وناسيين ان تعديل الدستور بعد أقل من اسبوع – 19 مارس – والدستور دا وثيقة خطيرة وهي اللي هتنظم حياتنا والتعديلات زي الزفت في رأيي واحنا كلامنا كان واضح دستور جديد لدولة برلمانية ميكونش فيها رئيس الجمهورية عنده كل الصلاحيات دي..التعديلات الجديدة مجتش جنب صلاحيات رئيس الجمهورية.. وأولاً هما بيتعاملوا مع اللي حصل دا مظاهرة احتجاجية بمطالب.. ومش قادرين يفهموا إن اللي حصل ثورة حقيقية لإسقاط النظام كله، بدستوره بقي بحكومته بسلاطاته ببابا غنوجه يعني..ف تعديل الدستور دا لا يتناسب مع كونها ثورة حقيقة وما ينفعش نرضي بيه.. هنا ما يسمي بالشرعية الثورية ..الشرعية من الثورة مش من الدستور اللي احنا اسقطناه.

ممكن من فضلكوا نرتب أولوياتنا ونركز شوية الجمعة الجاية لازم تكون مليونية لإسقاط الاستفتاء والمطالبة بجمعية تأسيسية لدستور جديد يلبي طموحات الثورة.

الشعب والشعب .. إيد واحدة

7 comments:

Anonymous said...

للاسف يا اسماء الناس مضحوك عليها من المجلس العسكرى اللى بيرقطسنا وعندى احساس ان اللى جاى من دكتاتورية وظلم هايخلى الناس البسيطه تترحم على نظام مبارك الحيوان..الناس مش عايزه تفهم ان مبارك مش هايسيبها بالساهل هو وادارته الفاسدة اللى الجيش احد بقاياها
مدحت نص

بشري باخوم said...

عشان نكون عمليين مع تقدير صحيح لحجم و توقيت الخطوه القادمه يجب مراعاه ان بعض المجموعات نادت من حوالي يومين بالانسحاب من التحرير وعدم التظاهر واكرر عدم التظاهر تضامنا و دعما لحكومه عصام شرف لذلك اذا كان التظاهر غير معد له كما يجب سواء علي مستوي حشد الناس او علي مستوي التوعيه بالسبب,اعني كارثه الدستور,فأري ان هذا قد يعمق من الانقسام بين الصفوف الوطنيه في وقت نحن في اشد الحاجه للتكاتف و نبذ الخلاف ومازال امامنا الجمعه 18 لذلك دون حشد مضمون ونشر اعلامي مقنع وكفء وكافي ستكون السلبيات اكثر بكثير من الايجابيات

Simsima said...

اللي جاي بتاعنا مش بتاع العسكر يا مدحت احنا اللي عملنا الثورة مش الجيش، ولازم ندافع عنها..مصر مش لازم تروح تاني من ايدينا

Simsima said...

مجموعات أكتر يا بشري طالبت بإن الجمعة دي تبقي مليونية الوحدة الوطنية..الدعوة فعلا موجودة ومع احترامي الكامل لشرف وحكومته اللي انا شايفه برضه ان نديلهم فرصة ، بس استفتاء الدستور خطير ومينفعش نسيبه يعدي

ابوجلال المصرى said...

السلام عليكم
اولا اعتذر عن تأخر ردى ...
وداكان لأنى لازم اتأكد من شويه حاجات كدا
بالنسبه للموضوع اللى انتى كتباه انا اتفق معاكى فى حاجه مهمه
الشعب والشعب ايد واحده ...
وبما ان الجيش من الشعب والشرطه من الشعب يبقى لازم نكون ايد واحده
زى ما كنتم فى ميدان التحرير
وزى ماحكيتي ....وزى ماتحكالى من ناس كتير
هاتقوليلي
امال اللى بيعمله الجيش دلوقتى فى شبابنا من القاء القبض والتعذيب ووو
اقولك
دا جيش ..عامل زى الصعيدى لما يتنشن ..هو طلب فرصه يعدل فيها الاوضاع ولما ماخدهاش قال يخدها بالقوه ...
وكلامى دلوقتى عن الفرصه اصبح ماهوش لازمه ..
اللى لازم يتعمل دلوقتى فعلا ..
هو اللى هايكون اليوم الجمعه فى ميدان التحرير ...
يجي رئيس القوات المسلحه ..
ورئيس الحكومه ..
وممثلين الاحزاب
وممثلين إتلاف الثوره ..
وكل اللى عنده حاجه يقولها
بس ياريت بسرعه ..وبصراحه وبشفافيه
وفى النهايه اقول
الايام اللى جايه راح تبين معدن الصالح ومعدن الطالح ...وتظهر المنافقين ...فصبرال الثوره
انكم على حق ونكم الفائزون ....ان شاء الله ..
بس بلاش بقى اعياد مرأه لأن دى حاجات تستفز اصحاب القلوب المريضه بعيد عنك
وشكلى كدا هانزل قريب ...
تحياتي

Eslam Mohamed said...

هنا ما يسمي بالشرعية الثورية ..الشرعية من الثورة مش من الدستور اللي احنا اسقطناه.و دمتم بجد

برود الجيش قالقني جدا كمان يا سمسمة, الوتر ده زي ما قولتي كان مفاتيحة مع أمن الدولة و بيلعبوا بية دلوقتي بالذات لان بعد شفيق مافضلهمش ساتر بجد , حتي إقتحام مقرات أمن الدولة الوثائق الى طلعت منها كلها بتضرب الناس فبعض اكتر منها مفيدة أمنياً
لازم خطوة جاية بس محتاجة تحضير كويس

زفات said...

اتمنى عوده مصر بلد الامن والامان


زفات
موقع زفات